ကြုံတုန်းကြိုက်တုန်းလေ ကျွန်တော်တို့ဆီက မိုက်တဲ့အကြောင်းပြောပြရဦးမယ်ဗျ။ အရက်သောက်တတ်တဲ့လူ တော်တော်များများကိုကြည့်မယ်ဆိုရင် အရက်မူးလာရင် သွေးဆိုးတတ်ကြတယ်။ ပြောချင်တာကတော့ ကျွန်တော်တို့လမ်းထိပ်က ကိုဂျက်ဖုန်းအကြောင်းပေါ့။ သူကအရက်စွဲနေတာတော့ မဟုတ်ဘူးဗျ။ ရွာထဲမှာ အလှူအတန်း မင်္ဂလာဆောင်ရှိတယ်ဆိုရင်တော့ စိတ်ရောလူပါ အင်တိုက်အားတိုက် ကူလုပ်ပေးတယ်။ အဲ… လုပ်ရင်းကိုင်ရင်းနဲ့ တော့သောက်တတ်တယ်။
တစ်နေ့မှာ ကိုဖုန်းတစ်ယောက် မင်္ဂလာဆောင်တစ်ခုကို ၀ိုင်းကူလုပ်ပေးရပါတယ်။ သူငယ်ချင်းတွေနဲ့သောက်ကြ စားကြ လုပ်ကိုင်ကြတာဆိုတော့ ကိုဖုန်းတစ်ယောက် သူ့ကိုယ်သူဘယ်လောက်သောက်မိလို့ သောက်မိမှန်းတောင်မသိပါဘူး။ လမ်းမတစ်လျှောက်တော့ သိုင်းကွက်အပြည့်နင်းပြီး ပြန်လာနေတယ်။
အဲမှာပဲ ကျွန်တော်ကလည်း ဆိုင်ကယ်နဲ့ အပြင်ကပြန်လာတာနဲ့တိုးရော။ ရှေ့ကယိုင်ထိုးယိုင်ထိုးနဲ့ သွားနေတာ မင်္ဂလာဆောင်အိမ်က ပြန်လာတဲ့ ကိုဖုန်းကြီးမှန်းသိလိုက်ပါတယ်။ ဒါနဲ့ သူကို စချင်နောက်ချင်တာနဲ့ ဆိုင်ကယ်ကို ဖြည်းဖြည်းစီးလာရင်း…
“တီ..တီ…တီ”
ဆိုင်ကယ်ဟွန်းတီးလိုက်တာပေါ့။ ကိုဖုန်းလှည့်ကြည့်လိုက်တယ်။ ဒါပေမယ့် ဆိုင်ကယ်မီးရောင်က မျက်လုံးကိုထိုးထားတော့ စိတ်တိုသွားတဲ့ပုံစံနဲ့
“ဟေ့…တီ..တီတွေ၊ ကျွတ်တွေ၊ မျှော့တွေ လုပ်မနေနဲ့ ငါကမြွေပွေးတောင် မကြောက်ဘူးကွ။ သိလား”
ဒါနဲ့ကျွန်တော်လည်း
“တိုက်ပစ်လိုက်မှာနော်။ တိုက်လိုက်မှာ”
“အေး မင်းတိုက်လည်း ငါမသောက်နိုင်တော့ပါဘူးကွာ။ ငါတော်တော်များနေပြီ”လို့ပြောပြီး သူ့အိမ်ထဲကို သိုင်းကွက်နင်းပြီး ၀င်သွားပါတယ်ခင်ဗျာ။ ။
No comments:
Post a Comment