 |
| ကျေးဇူးကမ္ဘာ အင်တာနက် |
ထားပါတော့။ ကျွန်တော်အင်တာနက်မသုံးခင်က အဖြစ်အပျက်လေးပြောပြမယ်။ ပညာရှာပမာ သူဖုန်းစားဆိုတော့လည်း ကိုယ်ကမသိတော့ သိတဲ့လူကိုလိုက်မေးရတာပေါ့။ ကျွန်တော့်ကံဇာတာစန်းလဂ်များ ဂြိုလ်တုတက်ချိတ်ချင်တော့ သူငယ်ချင်းတစ်ယောက်က အင်တာနက်ဂျိုး(ချိုး) ဖြစ်နေတယ်။
“ကျွန်တော်အင်တာနက်စွဲနေတာ တော်တော်ကြာပြီဗျ။ သူဆီမှန်မှန်သွားနိုင်ဖို့ ကျန်တဲ့ကုန်ကျစရိတ်တွေကို အကုန် လျှော့ချပစ်နေရတယ်။ ကွမ်း၊ ဆေးလိပ်၊ အရက်၊ လက်ဖက်ရည် ဖြတ်လိုက်ရတယ်။ မတတ်နိုင်ဘူးဗျာ။ အဲဒါတွေစွဲ တာကဖြတ်နိုင်တယ်။ အင်တာနက်က ဖြတ်မှမဖြတ်နိုင်တာကိုး”
ဗုဒ္ဓေါ၊ အရက်၊ ကွမ်း၊ ဆေးလိပ်တို့ထက်ပင်အစွဲကြမ်းသည်ဆိုပါလား။ အဲဒါနဲ့ပဲ ကျွန်တော့်ကို အင်တာနက်ဆိုတဲ့ သတ္တ၀ါကြီးကိုလိုက်ပြဖို့ နှစ်ယောက်သား ဆိုင်ကယ်နဲ့ အင်တာနက်ဆိုင်ကိုထွက်ခဲ့တယ်။ တိုက်တစ်လုံးရှေ့မှာ ဆိုင်ကယ်ကိုရပ်လိုက်တာနဲ့ အမျိုးသမီးတစ်ဦးထွက်လာပြီး “ကွန်နက်ရှင်ကျနေလို့” လို့ထွက်ပြောတယ်။ သူငယ်ချင်းက “ဟုတ်လား” လို့ပြန်ပြောပြီးပြန်လှည့်လာတယ်။ ဒါနဲ့ ကျွန်တော်က မေးလိုက်တယ်။ “ဘာပြောတာလဲ” ဆိုတော့ သူက “မင်းနားလည်အောင် ရှင်းပြရရင် ဆက်သွယ်ရေးတွေမကောင်းလို့ အင်တာနက်အသုံးပြုလို့မရဘူးလို့ပြောတာ”
“ဟာ.. ဒါဆို ငါအင်တာနက်ဆိုတာကြီးကို မကြည့်ရတော့ဘူးပေါ့နော်”
“နေစမ်းပါဦးဗျာ သည့်ပြင်နေရာတွေရှိပါသေးတယ်”
နောက်တစ်နေရာကိုရောက်တော့ ဆိုင်ထဲဝင်တဲ့အချိန်မှာပဲ ကျွန်တော်မြင်ချင်နေတဲ့ အင်တာနက်ဆိုတာကြီးကို မြင်လိုက်ရပါတော့တယ်။.
“ဟင် အင်တာနက်ကလည်း ငါတို့ဆီက ကွန်ပျူတာကြီးပါလား”
“ဟုတ်တယ်လေဗျာ အင်တာနက်ဆိုတာ ပစ္စည်းကိုခေါ်တာမှ မဟုတ်တာ။ လေလှိုင်းကိုခေါ်တာ။ လေလှိုင်းကို ကွန်ပျူတာနဲ့ ဖမ်းယူ အသုံးပြုတဲ့သဘောပေါ့ဗျာ”
သူငယ်ချင်းဖြစ်သူက တတ်နိုင်သလောက် ကြိုးစားရှင်းပြနေပါတယ်။ ကျွန်တော်ကလည်း နားလည်သလိုလိုနဲ့ အရင်လိုပါပဲ။ ကွန်ပျူတာအလုံး ၂၀ ကျော်ရှေ့မှာ ထိုင်နေတဲ့ လူ၂၀ ကျော်ကတော့ မည်သူ့ကိုမျှဂရုမစိုက်အား။ နိုင်ငံခြားကားထဲမှာပါတဲ့ ဂြိုလ်တုလွှတ်တင်ခါနီး ပင်မစက်ခလုပ်ခုံခန်းထဲက ၀န်ထမ်းများပုံစံပေါက်နေပါတယ်။ ကောင်မလေးအချို့က နားကြပ်များတပ်ထားပြီး မည်သူနှင့်ဆက်သွယ်နေသည်မသိ ရှက်ပြုံးလေးပြုံးလိုက်၊ ညှင်းညှင်းလေးရယ်လိုက် နှုတ်ခမ်းလေးစူလိုက် မျက်စောင်းလေးထိုးလိုက်နှင့် တစ်ဦးတည်းသရုပ်ဆောင်နေကြသည်။
သူငယ်ချင်းကတစ်လုံးတည်းသော လွတ်နေတဲ့ ကွန်ပျူတာရှေ့မှာနေရာယူလိုက်တော့ ကျွန်တော့်ကသူ့နောက်မှာ ထိုင်ပြီးကြည့်နေမိတယ်။ သူကတော့ ကျွန်တော်မသိတဲ့ ဟိုဟာဒီဟာတွေလုပ်နေတုန်း ကျွန်တော်ကတော့ သူငယ်ချင်းညာဘက်နဲ့ ဘယ်ဘက်ကိုတစ်ချက်လှမ်းရှိုးလိုက်မိသည်။ ညာဘက်မှာတော့ အသက် ၆၀ ကျော်(ခန့်မှန်းချေ ဒီထက်လည်းကြီးနိုင်) အဘိုးကြီးတစ်ဦးနှင့် ဘယ်ဘက်တွင်သွားခေါခေါဝက်ခြံဗရပျစ်နှင့် ခေတ်သစ်မင်းကုသ၏အမွှာ မယ်ကုသလုံမငယ်တစ်ယောက်ရှိသည်။(နှိမ့်ချခြင်းမဟုတ်တာ တကယ့်ရုပ်ကိုမြင်ရင် ကျွန်တော်ပြောတာလိုတယ်လို့တောင် ပြောဦးမယ်)
ကျွန်တော်ထင်တာတော့ အဘိုးကြီးက နိုင်ငံခြားရောက်နေတဲ့ သူ့သားသမီးနဲ့ ပြောနေတယ်ထင်တာပေါ့။ ဒီလိုနဲ့ သူ့စခရင်ကို ကြည့်လိုက်တော့ အဘိုးကြီးရိုက်လိုက်တာက
“မောင်လေးကိုတကယ်ချစ်တာမှ ဟုတ်ရဲ့လား”
မြတ်စွာဘုရား အဘိုးကြီးသတ်ပုံမှားရိုက်နေတာတော့ လုံးဝမဖြစ်နိုင်ဘူး။ သူ့အသက်အရွယ်နှင့် မောင်လေးဆိုသည့် ဝေါဟာရက သချိုင်းကုန်းကိုးကုန်းလောက်ဝေးသည်။ အမှန်ဖြစ်လျှင်လည်း တစ်ဘက်က အမျိုးသမီးက အသက် ၇၀ ကျော် ၈၀ နည်းပါးလောက်ဖြစ်နေပေလိမ့်မည်။ ဘာတွေပါလိမ့်။ နောက်မှသူငယ်ချင်းကို တိုးတိုးကြိတ်မေးကြည့်ရပေတော့မည်။
ညာဘက်က အဘိုးကြီးကို နားမလည်နိုင်သောကြောင့် ဘယ်ဘက်ကမယ်ကုသဘက်သို့ စောင်းငဲ့လေ့လာကြည့် မိသည်။ အံမယ် မယ်ကုသကလည်း အခြားတစ်ဘက်နှင့် စာတွေ အပြန်အလှန်ရိုက်ပြီး စကားပြောနေပါလား။ ဘာတွေရိုက်နေပါလိမ့်။
“တို့ပို့လိုက်တဲ့ ဓာတ်ပုံရပြီလား”
သူကလည်းမခေ။ ဒီစာအရဆိုရင် တစ်ဘက်ကို ဓာတ်ပုံပို့ထားသည့်ပေါ့။ ဒီလိုလှလွန်းဆွေ၏ ပုံကိုမြင်ရသည့် တစ်ဘက်က ပုရသမှာ ဘယ်လိုခံစားရမလဲ ဘယ်လိုတုံပြန်မလဲ မသိ။ ဒါနဲ့ မသိမသာလေး မျက်လုံးလေးထောင့်ကပ်၍ ဂရုစိုက်ကြည့်နေမိစဉ်မှာပင် တစ်ဘက်ကတုံ့ပြန်သော စာတမ်းပေါ်လာသည်။
“ရတယ်။ ဒေါင်းလုပ်တောင် ဆွဲထားတယ်။ လှလိုက်တာ မရယ်။ ပိုလို့တောင်ချစ်သွားမိတယ်။ တို့ပိုက်ဆံရှိရင် မ ကို မင်းသမီးတင်ပြီး ရုပ်ရှင်ရိုက်မှာ”
၃၇ မင်းကယ်တော့မူပါ။ ဒီရုပ်ကြီးကို တစ်ဘက်က ရွဲ့များပြောနေသလားပဲ။ တုံ့ပြန်သောစာတန်းက ဘယ်လိုမှ ယုံချင်စရာမရှိ။ ကျွန်တော်ညဏ်မမှီတော့ပါ။ ကျွန်တော့်သူငယ်ချင်းကိုသာ နောက်မှမေးကြည့်ပေတော့မည်။ ဒါနဲ့ပဲ ကျွန်တော့်သူငယ်ချင်းက ရှင်းပြတယ်။ မီးစိမ်းရင် ဘာဖြစ်တယ် ညာဖြစ်တယ်ပေါ့ဗျာ။ သိတယ်မလား။ ဒါနဲ့ပြန်မေးလိုက်တယ်။
“ဒါဆိုတစ်ယောက်နဲ့တစ်ယောက်မမြင်ဖူးဘူးပေါ့”
“ဘယ်မြင်ဖူးမလဲဗျ။ ဘယ်နေရာကဆက်သွယ်နေမှန်းတောင် သိရတာမဟုတ်ဘူး။ ပြောပြရင်တော့ သိမှာပေါ့လေ။ ဒါပေမယ့် အမှန်လား အမှားလားဆိုတာတော့ စစ်ဆေးလို့မှမရတာ။ တစ်ယောက်နဲ့ တစ်ယောက်မြင်ဖူးချင်ရင်တော့ VZO တပ်ရတယ်”
“ဓာတ်ပုံတွေ ဘာတွေရောပို့လို့ရလား”
“ရတာပေါ့။ ကြိုက်တဲ့ပုံပို့လိုက်။ ဟိုဘက်က ကူးယူထားလို့တောင်ရတယ်။ ဒေါင်းလုပ်ဆွဲတယ်လို့ခေါ်တယ်”
“သြော်”
ကျွန်တော်ဂေါက်သွားသော အဖြေတစ်ချို့ကိုရေးရေးလေးသဘောပေါက်လာပါပြီ။ အင်တာနက်ပေါ်တွင် အသက် ၆၀ ကျော်အဖိုးကြီးက မောင်လေးဟန်ဆောင်လို့ရသလို လှလွန်းဆွေမယ်ကုသက ပပ၀တီဖြစ်နိုင်သည်။ ဆယ်တန်းလေးခါကျက ဆေးကျောင်းသားဖြစ်နိုင်သလို ပလက်ဖောင်းဈေးသည်သမီးက နိုင်ငံခြားမှာ ကျောင်းတက်နိုင်သည်။
အင်တာနက်ဆိုတာကြီးကို ကျွန်တော်အရမ်းချစ်မိသွားပြီ။ ရုပ်မလှသောကျွန်တော်ပိုက်ဆံ ၅၀၀ ရှိလျှင် ရည်းစားထား၍ရနိုင်သည်။ ပါဝါမျက်မှန်နှင့် ထိပ်ပြောင်နေတာကို မမြင်ရစေရန် VZO ကြီးကိုအသုံးမပြုရန်နားလည်လိုက်သည်။ ဒီတော့နောက်ဆုံးပြောချင်တာကတော့ ကျေးဇူးကမ္ဘာ အင်တာနက်ပါလို့။
No comments:
Post a Comment